mappie's
brakfast o gowans:
sinny-sides up




rabbit's
breakfast of daisies:
sunny-sides up

fushionless -
tentie as gray cluds
dae a jeegsaw puzzle




listless -
watching grey clouds
do a jigsaw puzzle

the hern gaes stieve -
chork o
the bodach's laiky buits




the heron stiffens -
squelch of
the old man's leaky boots

nursery day oot
bairns' flags, balloons,
...tirl throuch the puppies




nursery day out
childrens' flags, balloons,
...breeze through the poppies

wull flooer
hingin blae an yalla
...airtist's dreepin brush




wild flower
hanging blue and yellow
...artist's dripping brush

douce fite rose
skiffin'r lips:
teenge o pink




sweet white rose
brushing her lips:
tinge of pink

muinlit perk -
wide-eed i the girse:
puddock stuils




moonlit field -
wide-eyed in the grass:
toadstools

freight train
rummles by -
spores win awa on the waff




freight train
rumbles past -
spores leave on the draught

craw hunkerin
on a siller birk -
thunner an lichtnin




crow sitting
on a silver birch -
thunder and lightning

flee raxes i the wab -
a bonnie lassie
plets'r gowden herr




fly struggles in the web -
a pretty girl
plaits her golden hair

washerwives stoiter
ablow bings o sheets -
a cludless lift




laundry ladies stagger
under piles of sheets -
a cloudless sky

lossin candidate
in's gairden
a clappit balloon




losing candidate
in his garden
a shrunken balloon

poorin weet -
in hoaspital winnocks
trummlin patients




pouring rain -
in hospital windows
trembling patients

his furst flicht -
the callant's
tuinless fusslin




his first flight -
the young man's
tuneless whistling

i the rose's heid
whurls
o derk sheddae




in the rose's head
whorls
of dark shadow

treen heeld
intae the timmer-yaird
...chitter




trees lean
into the timber-yard
...shiver

laddie an's dug doverin -
a wab-threid
leashin thaim




boy and his dog asleep -
a web-thread
binding them

the autistic laddie
traipses upstream -
derkness o craws abuin'm




the autistic boy
wanders upstream -
darkness of crows above him

the sloosh o a troot -
the lift
queevers




the splash of a trout -
the sky
quivers

swans preenin -
kinches
o a luvers' hank




swans preening -
loops
of a lovers' knot