fou muin -
honesty dirls
i the tirl




full moon -
honesty rattles
in the breeze

the day -
new roses
the colour o snaw




today -
new roses
the colour of snow

it sterts tae snaw -
the blin musicianer
leuks upwarts




it starts to snow -
the blind musician
looks upwards

wund chirts
atween heidstanes -
throuch the leaves:Kaddish




wind squeezes
between headstones -
through the leaves:Kaddish


(old Jewish cemetery:Prague)

snell -
the tooter crunkles
the clarinettist
blaws on's fingers




cold -
the cornet crackles
the clarinettist
blows on his fingers

pawtin the deepth
o the Hebrew scrieve:
shivers i the dorbie's baird




fingering the depth
of the Hebrew script:
chips in the stone-mason's beard

a snell wund -
the bodach hunkers
his box souchin




a bitter wind -
the old man sits
his accordion wheezing

a neon watergaw
skimmers on her sheeny buits -
doontoon leddy




a neon rainbow
glitters on her shiny boots -
downtown lady

hungower -
a'where he leuks
reid berries




hungover -
everywhere he looks
red berries

skirls
frae a far awa playgrun -
ma auld scuil hauf-caw'd doon




screams
from a faraway playground -
my old school half-demolished

the auld makar
hame frae the burnside -
breidnirls aye in's pooch




the old poet
home from the riverside -
breadcrumbs still in his pocket

mornin licht
muves athort the herth -
stour steerin




morning light
moves across the hearth -
dust stirring

toon causey -
abodie tint i the haar
o thair ain braith




city street -
everybody lost in the fog
of their own breath

her cauld neb
whan a preed'r -
furst day o 'Wunter Haiku'




her cold nose
when I kissed her -
first day of 'Winter Haiku'

maple tree nakit -
its huil
o skimmerin licht




maple tree naked -
its skin
of glittering light

auld dug
steek in's mou -
wushin he'd rin fir't




old dog
stick in his mouth -
wishing he had ran for it

unner the brig
a yaised condom -
ettlin tae heave i the tirl




under the bridge
a used condom -
trying to rise in the breeze

fite mait dreepin
frae craw's neb -
a hinmaist aipple




white flesh dripping
from crow's beak -
a last apple

at ma door
leaves in a bing
...chitterin




at my door
leaves in a pile
...shivering

the colour
gane frae'r gairden -
wunter licht lemes on her hauns




the colour
gone from her garden -
winter light gleams on her hands

scuil playgrun -
leaves flichterin efter bairns
flichterin efter leaves




school playground -
leaves chasing children
chasing leaves

the-day
the birk -
fou o auld nests




today
the birch tree -
full of old nests

licht throuch the treen -
monks'
orange cloots




light through the trees -
monks'
orange robes

the jakie -
his sheddae on the wa
amangst the graffiti




the wino -
his shadow on the wall
amongst the graffiti

aw saunts' day -
ten rodden berries
fir a rosary




all saints' day -
ten rowan berries
for a rosary

her reid pownie-tail
slaikit bi the wund -
leddie firefechter




her red pony-tail
licked by the wind -
lady firefighter